قصيدة عن الام بالعامية المصرية

يتوفر في تاريخ الأغنية المصرية أكثر من قصيدة عن الام بالعامية المصرية، رددها كبار المغنين، وكتب العديد من الشعراء المعاصرين والقدماء العديد من القصائد التي تعبر عن قيمة الأم، وعن مكانتها، وما تبذله وتقدمه من أجل راحة أبناءها، حيث أن الأم رمز الأمان والحنان والعطاء دون حساب، وبغير أن تنتظر مقابل، ولا يكون لها هم في الحياة الدنيا سوى سعادة فلذات أكبادها.

وخلال السطور التالية من هذا التقرير نستعرض قصيدة عن الام بالعامية المصرية، إلى جانب عرض عدد من العبارات التي تعبر عن مكانة الأم، وذلك على النحو التالي.

قصيدة عن الام بالعامية المصرية

من أشهر القصائد التي كتبت بالعامية المصرية في الفترة الأخيرة، هي القصيدة التي كتبها الشاعر الصعيدي المصري هشام الجخ، التي تحمل عنوان “طبعا مصلتش العشا”، والتي تقول كلماتها:

 قصيدة عن الام بالعامية المصرية
(6 أكتوبر 85)
يوم أجازة
لمّة خالاتي عندنا أو عند سِتّي
كلام حريم .. وانت خدتِ وانت جبتِ
أبويا كان يحس بلمة العيال .. يطير
وجواز خالاتي هكذا .. يوصّلوهم عند بير السلم بالكتير
ماعرفش ليه بيقولوا على باب العمارة إنه بير
المهم عيال خالاتي يجولنا بدري .. وابويا ينزل .. وانا الكبير
أنا اللي اقول مين اللي يُوقف .. وانا اللي اقول مين اللي يلعب
وانا اللي اقول مين اللي ياكل .. وانا اللي اقول مين اللي يشرب
كنت أكبرهم وهما عيال يا عيني صغيرين
أنا كنت أرخم طفل عنده عشر سنين
لما اغيب عن عين خالاتي يا إما تِلقاني ف مصيبة .. يا إما بعمل مشكلة
كنت عايش طول حياتي أسئلة
ماما .. بنصلي ليه؟
ماما .. مين بابا حسني؟
ماما .. يعني إيه عابر سبيل؟
ماما .. يعني ايه راجل أصيل؟
عيّل فَصِيل
كنت بسأل أسئلة ولا ليها رد .. ولا ليها عازة
بس السؤال اللي سألته وقتها .. كان مهم .. أحنا ليه واخدين أجازة؟
لِمعتْ عنيها ساعتها لمعة بحبِها
اللمعة دي على طول بتظهر لما بعمل حاجة أمي تحبها
لما بنجح .. لما بسأل .. لما بتنرفز على اخواتي البنات لو حد كركر
لما بعمل أي حاجة تحسّ فيها إني بكبر
لفّتْ على الكرسي اللي عمّر عندنا عشرين سنة
وبدأِت حكاوي ودندنة
ساعتين حكاوي ودندنة
ع اللي اتضرب واللي اتفنى .. واللي اتهدم واللي اتبنى
أبطال هنا وشهداء هنا
وانا وِدني أصلا مش هنا
كات ماما نجوى بتبدِي .. وانا إلّا دي
أنا لسة حاسمع حرب واكتوبر وخط بارليف وارض سينا ومين حماها ومين خطفها
دي حكاوي تافهة
كلام تقيل وكلام مجعلظ
ونجوى جت .. عايزين نبقلظ
هرِبت من نص الكلام .. لكني فاكره
انا كنت آ عيل صحيح
لكني فاهم الكلام من أوله ولحد آخره
إن اسرائيل سرقت سلامي
وان اسرائيل قتلت عمامي
واننا زي النهاردة .. خدنا تارنا
داقوا نارنا
عرفوا طعم جند مصر في المعارك
وان سوريا والجزاير والعراق والخليج وكله كله كله شارك
واننا بعد امّا فزنا
بعد مّا شافوا الوحدة بتوسع نفوزنا
وعلمنا بيرفرف عليهم تحت عينّا
دقوا نار الفتنة بينّا
كنت عيل بس فاكر .. كنت بلعب بس شاطر
كنت بحضر ماما نجوى وبابا ماجد
كنت انام احلم بجونجر .. واني حاكبر .. ابقى مارد
يجمع العرب اللي تايهين .. صف واحد
وابقى قائد
كنت انام احلم باني ف موقعة حطين
واني الامير هشام الدين
ومعايا جيش وسع المكان
ملوش لا اول في الشمال ولا في اليمين
بإشارة من إيدي الحصون متدشدشة
وإشارة من سيفي الحشود متفركشة
وإشارة من أمي اللي جت بتهزني وتقول لي طبعا نمت قبل ما تصلي العشا
(1 أكتوبر 89)
مين يا خويا
عيد ميلاد؟؟!!
والله خلَّفت وعَلَفت
وانت أطول مني عايز عيد ميلاد .. امشي ياد
في اعدادية ولسة بتفكر يا شَحْط في عيد ميلاد
روح لابوك .. كلمه في الشغل
قل له وانت جاي .. عدّي هات لي نفّاخة
شوف العيال لما تكبر تتملي مساخة
ثم خد يا بعيد .. ايه اللي خلا يوم ميلادك اسمه عيد
يَكْش فاكر يوم ميلادك اختفت نار المجوس
ولا حد قالك ان لقينا يومها شوال فلوس
ده احنا كنا العيش يادوبك والغموس
كنا مش لاقيين نجيب لك هدمتين
ايه ياد السعادة اللي انت فيها دي ؟ جاياك منين؟
ده احنا أفقر فترة عشناها في حياتنا .. حملي بيك
كانت البلد ولا فيها زيت ولا فيها سكر
والجو بينا وبين كل العرب .. كان شان وعكّر
والسادات كان كل يوم .. شدوا الحزام .. شدوا الحزام
والإعارات اللي كانت في الخليج رجعوا لنا تاني
والجنيه مابقاش يجيب ولا جوز حمام ولا نص ضاني
كنا دايرين نستلف من القريب ومن البعيد .. خليته عيد؟؟؟!!!
بس عارف
لما قالوا جه ولد .. ضهري اتسند
رغم اني كنت مخلفة قبلك بنات .. كنت انت بكري
أبوك حريمه كلهم جابوا الولاد بدري
وجدتك – في غياب أبوك – كانت تلقح بالكلام
وانا طبعا اهري
حتى لو ماقالتش حاجة .. أحنا ستات
أوعر كلام بنقوله بنقوله بسكات
ماكانش ابوك يعرف يا ولدي انهم سمّوني بينهم .. أم البنات
وماكنتش اعرف حظي الاغبر .. وان خلفة الولاد
حتجيب لي نَطْع يقول لي عايز عيد ميلاد
اسمع يا ولدي
اسمع وركز في الكلام
النبي عليه الصلاة والسلام
كان يحتفل بعيد ميلاده .. زيك تمام
ازاي بقى؟؟؟ بالصيام
يعني انت بكرة تجيني صايم
عيد ميلاد يعني تقوى .. مش جاتوه وباتوه وعزايم
ولا اقول لابوك على الدرجتين اللي نقصوا في التاريخ
مش عايز تعلّق نفاخات ؟؟ أجيب لك النفّيخ
خش ذاكر
أيوة واتنغوج وخبّط في البيبان .. هو يعني ابوك مسافر
بس ييجي وكل ده حيوصل له حاضر
تاني يوم الصبح وانا نازل ورايح المدرسة
لقيت ع السفرة كيكة مقطّعة ومكيّسة
قالت خد طفّح صحابك .. ما انتو جيل العيد ميلاد
جيل مايعرفش الخِشا
قول لي صح .. انت نمت الساعة كام؟
شكلك ما صلتش العشا

عبارات مؤثرة عن الأم

كتب العديد من الأدباء الكثير من العبارات المؤثرة عن الأم، ونعرض بعضها على النحو التالي:
 قصيدة عن الام بالعامية المصرية
  • من أكثر العبارات صدقًا وتأثيرًا ما كتبه الروائي المصري نجيب محفوظ “من يستهين بقدرات النساء أتمنى أن تعاد طفولته بدُون أم”.
  • الأم هي كل شئ في هذه الحياة هي التّعزية في الحزن الرّجاء فى اليأس والقوة في الضّعف.
  • بك يا أمّي أستطيع أن أعرف الله وأرى الجنّة.
  • قلب الأم هوة عميقة ستجد المغفرة دائما في قاعها.
  • ليس في العالم وسادة أنعم من حضن الأم.

اقرأ أيضًا

رسائل عن الأم

أضف تعليق